JMT: El-Nino kuchaymoqda, Tinch okeani suvi rekord darajada isishi kutilmoqda
Jahon meteorologiya tashkiloti (JMT) 8-oktabr kuni El-Nino hodisasi kuchayib borayotganini maʼlum qildi. Prognozga ko‘ra, 2026-yilning oktabr–dekabr oylarida Tinch okeanining markaziy va sharqiy ekvatorial qismida suv yuzasi harorati meʼyordan taxminan 3,7 °C yuqori bo‘ladi va dekabrga yaqin eng yuqori nuqtaga chiqadi. Bu kuzatuvlar boshlanganidan buyon eng katta ko‘rsatkich: avvalgi rekord — 2,6 °C — 2015-yil noyabr – 2016-yil yanvarda qayd etilgan edi.
El-Nino — Tinch okeanining tropik qismida suv yuzasi bir necha yilda bir marta odatdagidan ko‘proq isib ketadigan tabiiy hodisa. U butun sayyoradagi ob-havoga taʼsir qiladi: ayrim hududlarda qurg‘oqchilik, boshqalarida kuchli yomg‘ir va toshqinlar ehtimolini oshiradi.
JMT maʼlumotiga ko‘ra, okean harorati ko‘rsatkichi iyundagi +1,6 °C dan avgustda +2,5 °C gacha tez ko‘tarilgan. O‘n uchta milliy va xalqaro markaz prognozlariga asoslangan xulosaga ko‘ra, El-Nino 2027-yil fevraligacha saqlanib qolishi deyarli aniq.
Mutaxassislar yaqin oylarda sayyoraning katta qismida havo harorati meʼyordan yuqori bo‘lishini kutmoqda. Tinch okeanining ekvatorial qismida yog‘ingarchilik ko‘payishi, Hindiston yarimorolida esa kamayishi mumkin. Tashkilot bu yilgi avgust kuzatuvlar tarixidagi eng issiq avgust bo‘lganini ham qayd etdi.
Rasmda — okean yuzasi haroratining meʼyordan farqi (2026-yil 11-oktabr). Tinch okeani ekvatori bo‘ylab cho‘zilgan qizil “til” — El-Nino belgisi.
Manba: wmo.int. Rasm: NOAA Coral Reef Watch xaritasi
