“Avtomobilsiz kun”: har oyning 10 va 25-sanalarida mashinasiz yurishga chaqirilmoqda
Oʻzbekistonda har oyning 10 va 25-sanalarida “Avtomobilsiz kun” aksiyasi o‘tkaziladi. Ekologiya va iqlim o‘zgarishi milliy qo‘mitasi 10-oktabrdagi navbatdagi aksiya oldidan barcha tashkilotlar va aholini unda faol qatnashishga chaqirdi.
Aksiya Prezidentning 2026-yil 25-martdagi “Toza havo” umummilliy loyihasi to‘g‘risidagi farmoniga muvofiq o‘tkaziladi. Maqsad — avtomobillardan havoga chiqadigan zararli gazlarni kamaytirish hamda jamoat transporti, velosiped va elektromobil kabi ekologik toza transportdan foydalanishni odatga aylantirish.
Bu kunlarda qo‘mita va uning hududiy boshqarmalari xodimlari xizmat hamda shaxsiy avtomobillaridan voz kechib, ishga jamoat transportida yoki velosipedda boradi. Qo‘mita maʼlumotiga ko‘ra, natijada havoga chiqadigan zararli moddalar ham, shahardagi tirbandliklar ham kamaymoqda. Davlat xizmatchilari uchun bu qoida majburiy: aksiya kunlari avtomobildan foydalanish javobgarlikka sabab bo‘ladi. Qolgan aholi aksiyaga ixtiyoriy ravishda qo‘shilishga chaqirilmoqda.
Aksiyaga qo‘shilish oson: shu kunlari maktabga yoki ishga piyoda, velosipedda yoki jamoat transportida boring.
Manba: gov.uz
