“Orolqum” milliy bog‘ida Qizil kitobga kiritilgan qironqora suratga olindi

“Orolqum” milliy tabiat bog‘i xodimlari qironqorani parvoz paytida suratga oldi. Bog‘ Qoraqalpog‘iston Respublikasining Mo‘ynoq tumanida joylashgan. Suratni ekologiya idorasi eʼlon qildi.

Qironqora — yirik burgut. U Oʻzbekiston Qizil kitobiga, Tabiatni muhofaza qilish xalqaro ittifoqining Qizil ro‘yxatiga va CITES konvensiyasining I ilovasiga kiritilgan. Dunyoda 3 500 tadan 15 000 tagacha qironqora bor deb baholanadi.

Bahorda bu qushlar fevral–aprel oylarida, kuzda oktabr–dekabr oylarida uchib o‘tadi.

Mutaxassislar qironqora kamayishining sabablari sifatida cho‘l va chala cho‘l yerlarning o‘zlashtirilishini, uyalarning buzilishini va qushlarning elektr uzatish tarmoqlarida nobud bo‘lishini ko‘rsatadi.

“Orolqum” milliy tabiat bog‘i 2022-yil 4-martda tashkil etilgan. Bu yerda 25 turdagi hayvon yashaydi, to‘rttasi Qizil kitobga kiritilgan.

Qizil kitob bo‘limida: qironqora.