Markaziy Osiyo davlatlari iqlimga chidamli taʼlim uchun “Yashil maktab” platformasini muhokama qildi
13-fevral kuni Ostonada Markaziy Osiyoning besh davlati taʼlim va atrof-muhit vazirliklari vakillari, xalqaro tashkilotlar va hamkorlar ishtirokida yuqori darajadagi tayyorgarlik uchrashuvi bo‘lib o‘tdi. U 22–24-aprel kunlari Ostonada o‘tadigan Mintaqaviy ekologik sammit 2026 arafasida tashkil etildi. Uchrashuvda iqlim o‘zgarishi haqidagi taʼlimning ahamiyati muhokama qilindi.
Asosiy mavzu – Qozog‘iston hukumati tashabbusi bilan tuzilayotgan Mintaqaviy “Yashil maktab” platformasi bo‘ldi. U davlatlarga iqlim taʼlimini rivojlantirish, maktab binolarini iqlim xavflariga chidamli qilish va yoshlarning ekologik tashabbuslarini qo‘llab-quvvatlashda yordam beradi. Platformani sammitda maʼqullash rejalashtirilgan.
YUNISEF maʼlumotiga ko‘ra, Markaziy Osiyoda 23 millionga yaqin bola kuchli jazirama, qurg‘oqchilik, havo ifloslanishi va suv tanqisligi kabi yuqori darajadagi iqlim xavflariga duchor bo‘lmoqda. Bu ularning sog‘lig‘i, o‘qish natijalari va taʼlimdan uzluksiz foydalanishiga taʼsir qiladi.
Uchrashuvda YUNISEF mutaxassislari iqlim o‘zgarishi mavzusini o‘quv dasturlari va dars jarayoniga kiritish bo‘yicha qo‘llanmani taqdim etdi. Mintaqa maktablarida o‘tkazilgan energetik tekshiruvlar esa ko‘plab maktab binolari eskirgani va iqlim taʼsiriga yetarlicha tayyor emasligini ko‘rsatdi. Tashkilot hisobiga ko‘ra, iqlimga chidamli maktab yondashuvlari keng joriy etilsa, mintaqadagi 24,4 million bola va 24 mingdan ortiq maktab hamda ijtimoiy obyekt bundan naf ko‘rishi mumkin.
Manba: unicef.org
