Ikki yarim yilda tabiatga yetkazilgan zarar 77 mln dollardan oshgani aniqlandi

Ekologiya vazirligi matbuot xizmati 2023-yildan 2025-yilning dastlabki besh oyigacha bo‘lgan davrda ekologik nazorat natijalarini eʼlon qildi. Davlat ekologik nazorat inspeksiyasi huquqni muhofaza qilish organlari bilan birgalikda 3,5 mingdan ortiq reyd o‘tkazgan.

Natijada ekologiya qonunchiligini buzgan 110 941 nafar shaxs aniqlandi. Ularga jami 115 milliard so‘m (taxminan 9 million dollar) miqdorida maʼmuriy jarima solindi.

5 439 ta korxonada o‘tkazilgan tekshiruvlarda 3 433 ta qoidabuzarlik qayd etildi, 1 738 nafar mansabdor shaxsga nisbatan bayonnoma tuzildi. Vazirlik 4 669 ta majburiy ko‘rsatma berdi, 245 ta korxona faoliyati kamchiliklar bartaraf etilgunga qadar to‘xtatildi.

Inspeksiya ikki yarim yil davomida prokuraturaga 429 ta jinoyat ishi bo‘yicha materiallar yubordi. Ular bo‘yicha tabiatga yetkazilgan umumiy zarar 982 milliard so‘mni (77,3 million dollar) tashkil etdi. Shundan 171 tasi 2023-yilda, 172 tasi 2024-yilda va 86 tasi 2025-yilning birinchi choragida yuborilgan. 275 ta holatda jinoiy ish qo‘zg‘atilgan.

Bu raqamlar tabiatni asrash nafaqat ixtiyoriy ish, balki qonun bilan qatʼiy himoya qilinadigan majburiyat ekanini ko‘rsatadi. Noqonuniy daraxt kesish, chiqindi tashlash yoki ov qilish uchun katta jarima va hatto jinoiy javobgarlik belgilangan.

Manba: gazeta.uz