Zygophyllum bucharicum B Fedtsch.
Maqomi: 1. Janubiy Pomir-Oloydagi past tog‘larda tarqalgan kamyob endemik o‘simlik.
Qisqacha tavsifi: Bo‘yi 1 m ga yetadigan sershox buta. Barglari 2 bargchali, 5–7 mm uzunlikdagi bandlari orqali shoxlarga o‘rnashgan. Yaproqchalari qalami, seret, uzunligi 5–7 mm, yosh yaproqchalari mayin tukli, vaqt o‘tishi bilan tuksizlanadi. Tojbarglari sariq, 10–12 mm uzunlikda. Mevasi deyarli sharsimon, tuksiz, 5 uyachali quticha, uyachalari keng qanotchali. Aprel–may oylarida gullab, mevasi may–iyunda yetiladi.
Tarqalishi: Surxondaryo viloyati: Ko‘hitang tizmasi va Surxondaryoning quyi oqimida tarqalgan. Turkmaniston va Janubiy Tojikistonda ham uchraydi.
O‘sish sharoiti: Past tog‘lardagi gipsli ola jinslarda o‘sadi.
Soni: Juda siyrak tarqalgan.
Ko‘payishi: Urug‘idan ko‘payadi.
O‘simlik soni va arealining o‘zgarish sabablari: Maydoni qisqarib borayotgan ola jinsli yonbag‘irlarda o‘sadigan relikt tur.
Madaniylashtirilishi: Maʼlumotlar yo‘q.
Muhofaza choralari: Maxsus muhofaza choralari ishlab chiqilmagan. Manbalar. [30, 159, 310].
«O‘zbekiston Qizil kitobi» © O‘R FA Zoologiya instituti, 2009