Bilasizmi, LED lampochka oddiy cho‘g‘lanma lampadan necha barobar tejamkor?

Anʼanaviy cho‘g‘lanma lampochka sarflagan elektr energiyasining katta qismini yorug‘likka emas, issiqlikka aylantiradi. Yonib turgan bunday lampaga qo‘lingizni yaqinlashtirsangiz ham issiqlik taftini sezasiz (lekin uni ushlamang – kuydirib olish mumkin!).

AQSh Energetika vazirligi maʼlumotlariga ko‘ra, sifatli LED lampalar cho‘g‘lanma lampalarga nisbatan kamida 75 foiz kam energiya sarflaydi va 25 barobargacha uzoq xizmat qiladi.

Bu tabiat uchun nima uchun muhim?

Elektr energiyasining katta qismi hanuzgacha gaz, ko‘mir kabi yoqilg‘ilarni yoqish orqali ishlab chiqariladi. Kam energiya sarflash – havoga kamroq zararli gazlar chiqishi demakdir.

Uyda energiyani tejash bo‘yicha maslahatlar

• Xonadan chiqayotganda chiroqni o‘chiring.
• Kunduzi imkon qadar tabiiy yorug‘likdan foydalaning.
• Ishlatilmayotgan zaryadlovchi qurilmalarni rozetkadan sug‘urib qo‘ying.
• Yaroqsiz bo‘lgan LED va energiya tejovchi lampalarni oddiy chiqindiga tashlamang – ularni maxsus qabul punktlariga topshiring.