Мақоми 2. Ҳисор тоғининг ғарбий тармоқларида тарқалган камёб тур.

Қисқача тавсифи. Бўйи 1 м га етадиган пўстлоғи қўнғир рангли бута. Баргчалари 6-9 жуфт, чўзиқ ва чўзиқ-думалоқ шаклда, учи бироз ўткир, устки томони деярли туксиз, пастки томони сийрак тукли. Гулпопуги тиғиз, тухумсимон, узунлиги 5 см атрофида. Дуккаги бандсиз, чўзиқ ёки тасмасимон, узунлиги 12-18 мм, эни 4 мм, майда-майда, ўткир учли, қалин ва қора ярим ётиқ ҳамда узун ва сийрак оқ туклар билан қопланган. Июнь-июлда гуллаб, июль-августда мева беради.

Тарқалиши. Қашқадарё вилояти: Ғарбий Ҳисор тизмасининг Кўл ва Шут қишлоқлари теваракларида тарқалган. Тожикистонда ҳам учрайди.

Ўсиш шароити. Майда жинс тупроқли ёнбағирларда тоғларнинг ўрта қисмидаги наъматак ва арчазорларда ўсади.

Сони. Якка-якка ҳолда тарқалган.

Кўпайиши. Уруғидан кўпаяди.

Ўсимлик сони ва ареалининг ўзгариш сабаблари. Аниқланмаган.

Маданийлаштирилиши. Бу ҳақда маълумотлар йўқ.

Муҳофаза чоралари. Ҳисор давлат қўриқхонасида муҳофаза қилинади.

А. С. Эсонқулов.